عن " الغربة "

·         اخر بنت حلوة بتعرف عربى وبتساعد  وتعجب بالشباب المكافح اللى زيك فى الغربة كانت اللى طلعت مع هانى رمزى فى ابو العربى

·         السفارة المصرية فى البلد اللى رايحها عامله زى حفلة طهور ابن الجيران مش لازم تعجبك لكن لازم تروح وتجامل وف الاغلب مش حيردولك المجاملة دى – لانك  عشان تيجى هنا اكيد انته مطهر من زمان –

·         لا اعرف – هى الاجابة الاكثر احتراما وتقبلنا عن كثير من قبيل " انا قلت عيب اقولك معرفش "

·         محاولاتك المستميتة لتظهر انك مش اجنبى " وابن بلد ومدقدق " لا تزيد السبخ الا روثا .... تعامل من منطلق انك اجنبى وبتحب المكان احسن

·         مجارة الناس فى العادات الغير متفقة معك مش حيخليك الشاب الاسبور " تشرب خمرة – تبوس السكيرتيرة الصبح " بقدر ما حيجعلك محترم اكتر لو ابتسمت ابتسامة حلوة – من اللى من شحمه الودن اليمين لغايه شحمة الودن الشمال – وفهمتهم بالراحة انك مش متعود على كدا

·         مجارة الناس فى العادات المحترمة دا فعلا اللى حيخليك الشاب الجامد " تنزل الصبح تجرى – تروح تلعب رياضة – تشارك معاهم فى الكامب اللى عاملينه فى الويك اند – تلم معاهم تبرعات انته اولى بيها من اجل حياة افضل لانثى النعامة "

·         السياسة والدين والجنس ليست على قائمة حوارات الشات بين الناس فى اليوم العادى فمتحاولش تحول ساعة الغداء كل يوم لدرس تديه فى اى منهم على حوالى 10 اشخاص انته عارف انك عمرك ما حتقنعهم بالشكل دا ... الاحسن انك تسمع لو حد سالك وتجاوب اجابة صغيرة مع الابتسامة اياها وبعدين لو حسيت ان حد مهتم يعرف اكتر ابعتله على الايميل او ابقى ناقشه بشكل شخصى دا حيديله فرصه احسن يسمعك وما يتكبرش على انه يعترف بخطاه لو نقطة الخلاف لصالحك

·         اسم امك مش عيب ولا شتيمه على فكره ...معظم الورق الرسمى بيطلب اسم الاب واسم الام ....حاول تعرفه من الحاجة قبل ما تسافر ....حينفعك

·         وانته مسافر بيبقى عندك دايما فرصه انك تكون احمد زكى فى النمر الاسود او هنيدى فى امستردام لكن برضه فيه احتمال انك تبقى احمد مظهر وعم هنيدى فى نفس الافلام ....يعنى تساعد الناس  اللى زيك مش كل الناس تساعدك وخلاص

·         خيراً تعلم ...خيراً تلقى ان شاء الله .... بس مش شرط فى نفس اللحظة والحال والوقت واكيد مش من نفس الشخص  

·         بلاش نظرية دنا كنت بحب شبشب فى مصر ... لان النعل واحد بس فيه حاجات كتير فوتوشوب مش حتاخد بالك منها فى الوهلة الاولى

·         لما تعمل حاجة كويسه او تنجح فى شغلك افتكر ان دا مش عشان انته فلته عصرك ولا " انما اوتيته على علم عندى" ولا عشان جيناتك محصلتش بقدر ما هو توفيق من ربنا ليك – احمده عليه عشان ما يروحش- ثم انك اتعلمت كويس فى بلدك – طبعا انته شايف انك ما اتعلمتش حاجة خالص لكن على الاقل هما هناك جهزوك للاصعب فبقى اى حاجة بعد كدا سهله – فاظهر امتنانك الحقيقى لمن ساعدك حتى لو عن طريق تطفيشك – لولا انه طفشك ما كنش زمانك هنا دلوقتى .

·         اغنية الغربة  للبلبيسبى من الروائع ...بس البست سيلنج حاليا فى بلاد بره هو " لما عم الحاج يعدى "